विराटनगरः प्रदेश १ का आन्तरिक मामिला तथा कानूनमन्त्री केदार कार्कीले लागूऔषध दुरुपयोगलाई रोक्नका लागि सबैको भूमिका महत्वपूर्ण रहने बताएका छन् ।
आइतबार अन्तर्राष्ट्रिय लागू पदार्थ तथा अवैध तस्करीविरुद्ध दिवसको अवसरमा विराटनगरमा आयोजित प्रभातफेरी कार्यक्रममा मन्त्री कार्कीले लागू पदार्थको अवैध कारोबारलाई निरुत्साहित पार्न प्रदेश सरकार लागिरहेको बताए । ‘प्रदेश सरकार लागू पदार्थ दुरुपयोगलाई निरुत्साहन गर्न लागिपरेको छ, सबै सँगको समन्वयमा यो सम्भव पनि छ,’ उनले भने, ‘आन्तरिक मामिला मन्त्रालयले पुनःस्थापना केन्द्रहरू, जिल्ला प्रशासन कार्यालय, प्रदेश प्रहरी कार्यालय र जिल्ला प्रहरी कार्यालयहरूसँग समन्वय गरिरहेको छ ।’
खासगरी किशोरकिशोरी समूहका विद्यार्थीहरु लागूऔषधको अवैध प्रयोगकर्ता बढी रहेको उल्लेख गर्दै मन्त्री काकीले त्यसलाई रोक्नका लागि पनि विद्यार्थीले नै भूमिका खेल्नुपर्ने बताए । ‘एउटा विद्यार्थी घरपरिवारभन्दा बढी साथीसँग नजिक हुन्छ भने, उ कुलतमा फस्न लाग्दा साथीले नै रोक्न सक्छ’, उनले भने, ‘त्यसका लागि मन्त्रालयले चाँडै कल सेन्टरको स्थापना गर्छ, प्रहरीका एकाईहरू छन् त्यहाँ पनि खबर गर्न सक्नुहुनेछ ।’
मोरङका प्रमुख जिल्ला अधिकारी काशीराज दाहालले तीनै तहका सरकार लागू पदार्थ दुरुपयोगलाई निरुत्साहन गर्न लाग्नुपर्ने बताउँदै प्रदेश सरकारले महत्वपूर्ण भूमिका निर्वाह गरिरहेको बताए । नवज्योति पुनःस्थापना केन्द्रका अध्यक्ष सुशील रिजालले पुनःथापना केन्द्रमा काम गर्नेहरूले दिनरात नभनी काम गर्दै आएको बताए । कार्यक्रममा जिल्ला प्रहरी कार्यालय मोरङका प्रमुख शान्तिराज कोइराला, कोसी अस्पतालका प्रमुख डा.यज्ञराज खरेल, सुरक्षा निकायका प्रतिनिधि, पुनःस्थापना केन्द्रका प्रतिनिधि, विभिन्न क्याम्पसका विद्यार्थी लगायतको सहभागिता रहेको थियो ।
