इटहरीः संगीत क्षेत्रमा आफ्नो छुट्टै पहिचान बनाउन सफल गायिका तथा संगीत प्रशिक्षक सुनिता कटवालले नयाँ गीत ‘दिलको बिर्को’ सार्वजनिक गरेकी छन्। दशैं नजिकिँदै गर्दा उनले आफ्ना श्रोता तथा दर्शकका लागि गायक साजन राईसँगको सहकार्यमा नयाँ सांगीतिक प्रस्तुति ल्याएकी हुन्।
गायिका कटवालको आफ्नै ‘सुनिता कटवाल अफिसियल’ युट्युब च्यानलमार्फत सार्वजनिक गरिएको ‘दिलको बिर्को’ लोकआधुनिक शैलीको गीत हो। गीतमा सुनिता कटवाल र साजन राईको स्वर रहेको छ। गीतको शब्द, संगीत तथा एरेन्जमेन्टको जिम्मेवारीसमेत गायक साजन राईले नै सम्हालेका छन्।
श्रोता–दर्शकलाई मनोरञ्जन प्रदान गर्ने र नाच्नसमेत प्रेरित गर्ने शैलीमा तयार पारिएको गीतको म्युजिक भिडियोसमेत निर्माण गरिएको छ। स्थानीय पर्यटकीय स्थललाई पृष्ठभूमिमा राखेर तयार पारिएको भिडियोमा सुनिता कटवाल र साजन राई स्वयंले अभिनय गरेका छन्।
गीतको मिक्सिङ तथा मास्टरिङ राजु कार्कीले गरेका हुन्। सांगीतिक प्रस्तुति र भिडियो निर्माणमा मेहनत गरिएको निर्माण पक्षले जनाएको छ।
गायिका सुनिता कटवाल पछिल्लो समय गायनसँगै संगीत प्रशिक्षणमा समेत सक्रिय छिन्। उनी इटहरीमा निषाद संगीत विद्यालय सञ्चालन गर्दै नयाँ पुस्तालाई संगीत शिक्षा प्रदान गर्दै आएकी छन्। उनको प्रशिक्षणबाट विभिन्न संगीतकर्मी उत्पादनमा समेत योगदान पुगेको छ।
कटवाल एकैपटक धेरै गीत सार्वजनिक गर्नेभन्दा पनि आफूलाई उपयुक्त लागेका सिर्जना छनोट गरेर मात्र स्वर दिने गायिकाका रूपमा परिचित छन्। उनी वर्षमा सीमित संख्यामा मात्र गीतमा स्वर दिने गर्छिन्। गीत छनोटमा विशेष ध्यान दिने भएकाले पनि उनका नयाँ सांगीतिक प्रस्तुतिलाई श्रोता–दर्शकले चासोका साथ हेर्ने गरेका छन्।
यसपटक गायक साजन राईसँगको सहकार्यमा आएको *‘दिलको बिर्को’*ले दशैंको सांगीतिक माहोलमा श्रोता–दर्शकको मन जित्ने अपेक्षा गरिएको छ। सुनिता कटवाल र साजन राईको यो नयाँ सिर्जनाले नेपाली सांगीतिक क्षेत्रमा सफलता हासिल गरोस् भन्ने शुभकामना।
