दुहबीः दुहबीमा रहेको बुढी खोलामा यस वर्ष पनि छठ पूजा समिति दुहबीले भव्यताका साथ छठ पर्व मनाउने भएको छ ।
बुढी खोलाको किनारमा छठ पूजा मनाउँदै आएको समितिले यस वर्ष ९ सय श्रद्धालुले छठ पूजा गर्ने अनुमान गरेको छ । यस वर्षको छठ पर्व अवलोकनका लागि करिब ३० हजार भक्तजन सहभागी हुने जनाइएको छ । यस वर्ष घाट फराकिलो हुनुको साथै बिजुली, खानेपानी आदि सेवा सहज रूपमा उपलब्ध हुने समितिका अध्यक्ष श्यामकुमार दाहालले जनाए ।
२७ गते मङ्गलबार छठ पूजा आरम्भ हुने, दिउँसो धार्मिक सांस्कृतिक कार्यक्रम हुने र साँझमा सन्ध्याकालीन आराधना हुने बताइएको छ । छठ पूजाको अन्तिम दिन २८ गते बुधवार बिहान सूर्यको आराधना गर्नुको साथै पूजा सम्पन्न गरी प्रसाद वितरण गरिने कार्यक्रम रहेको समितिका सल्लाहकार सुविर उपाध्यायले जनाए । छठ पूजा सम्पन्न गर्न १० लाख खर्च लाग्ने अनुमान गरिएको समितिले जनाएको छ ।
समितिका अध्यक्ष दाहालले यस वर्ष सूर्य देवताको मन्दिर निर्माण गर्ने योजना रहेकाले आफूले घाट परिसरबाट ६ सय मिटर भित्र २ कठ्ठा जग्गा दिने बताए । शक्तिरूपी छठीमाता र संसारलाई प्रकाशमान पार्ने सूर्यदेवको संयुक्त रूपमा पूजा गरेर पर्व मनाउने गरिन्छ । परिवारको कल्याण, सन्तान प्राप्ति र छाला रोगका साथै विभिन्न रोगबाट पर रहनका लागि यो पर्व मनाउने गरिन्छ ।
सबै जाति, उमेर, धर्म, लिङ्ग, दल, वर्ग र सम्प्रदायका व्यक्ति सहभागी हुने यो पर्वमा घरका ज्येष्ठ र स्वस्थ महिलाले पूजाको नेतृत्व गर्छन् । यो पर्वमा घरदेखि घाटसम्म युवा पुस्ताको सक्रिय सहभागिता हुन्छ । घाट सिँगार्ने, पूजा सामग्री बोक्ने र धार्मिक विधिमा सहयोग गर्नेमा उनीहरू सबैभन्दा अघि हुन्छन् । एक्लैले यो पर्व गर्नु सम्भव हुँदैन ।
घरमा ठेकुवा एवं भुसुवालगायतका प्रसाद तयार गर्नेदेखि घाटमा अर्घ दिने बेलासम्म छिमेकीसमेत सहयोग गर्न आइपुग्छन् । आर्थिक रूपले असक्षमले भिक्षा मागेरै पनि खुशी एवं गर्वका साथ यो पर्व मनाउँछन् । आफँैले व्रत गर्न नसक्नेले चिनेका व्रतालुलाई सामग्री किनेर दिई पूजामा सहभागी हुन्छन् ।
घरदेखि जलाशय किनारसम्म रमझम हुने यस पर्वमा सहभागी हुँदा र प्रसाद मागेर खाँदा पूजा गरेजत्तिकै धर्म हुने विश्वास गरिन्छ ।
यसरी बनाइन्छ प्रसाद
यस पर्वको चर्चित प्रसाद ठेकुवा गहँुको पिठोमा सख्खर, घिउ, नरिवल, सुप, छोकडा र किसमिस मिसाएर खजुरी झैं आकारको बनाइन्छ । त्यसैगरी चामलको पिठोमा यिनै सामग्रीहरू मिसाई भुसुवा बनाइन्छ । हातले वा काठको ब्लकमा ठोकीठोकी बनाउने हुनाले ठेकुवा नाम भएको बताइन्छ । त्यस्तै, खाँदाखेरि भुसभुस फुट्ने हुनाले भुसुवा भनिएको बताइन्छ ।
ती पकवानका साथै विविध प्रकारका मौसमी फलफूल, गेडागुडी, सुपारी, सुकमेल, काजु, किसमिस, बदाम र छोकडालगायतका सामग्रीलाई बाँसको कोनिया, ढकी र नाङ्लोमा राखिन्छ । मुख्य व्रतालुले परिवारजनसहित गीत गाउँदै घाटमा पुगी षष्ठीको साँझ अस्ताइरहेको र सप्तमीको बिहान उदाइरहेको सूर्यलाई अर्घ दिन्छन् ।
