विराटनगरः राजनीतिक दाउपेजमा आधारित नाटक ‘महाभोज’ विराटनगरमा मञ्चन सुरु भएको छ ।
जनतालाई भोटबाहेक केही नदेख्ने राजनीतिकर्मी र बाँचुञ्जेल उत्पीडनमा पारिएकाहरूको कथा देखाएको छ नाटक ‘महाभोज’ले । गरिब जनताको लासमाथि हुने राजनीतिमा नाटक केन्द्रित छ । लगभग ४० वर्षअगाडि लेखिएको ‘महाभोज’लाई तीन ‘पी’मा बुनिएको छ– प्रेस, पोलिटिक्स र पुलिस । राजनीति, प्रहरी र पत्रकारिता कसरी एकअर्कासँग जोडिएका छन् र त्यसको चक्रब्यूह भित्र जनता कसरी कैद छन् भन्ने कुरा नाटकमा देखाइएको छ ।
विराटनगर गुरुकुलमा बुधबार एक कार्यक्रमबीच प्रदेश १ का मुख्यमन्त्री शेरधन राईले सुशीला कोइराला नाटक घरमा नाटक उद्घाटन गरे ।
प्रदेश–१ सरकारसँगको सहकार्यमा मण्डला नाटक समूह नेपालले हाटखोलास्थित सुशीला कोइराला नाटकघरमा महाभोज मञ्चन गरेको हो । भारतमा आयोजित भारत रंगमहोत्सवमा छनौट भएर जानेक्रममा मण्डलाले विराटनगरमा नाटक मञ्चन गरेको हो । हिन्दी साहित्यकार मन्नु भण्डारीको उपन्यासलाई नेपाली भाषामा नाट्य रूपान्तरण विप्लव प्रतीकले गरेका हुन् । नाटक हेर्न प्रदेश–१ का मुख्यमन्त्री शेरधन राई, प्रदेश–१ भरिका रंगकर्ममा सक्रिय कलाकार, साहित्यकार, विभिन्न राजनीतिक दलका प्रतिनिधि, विद्यार्थीलगायतको सहभागिता थियो ।
मुख्यमन्त्री राईले नाटकले देशको वर्तमान अवस्थालाई देखाएको बताए । गत भदौमा काठमाडौंस्थित मण्डला नाटकघरमा मञ्चन भएको नाटक महाभोज समीक्षात्मक रूपमा सफल मानिएको सो नाटक दिल्लीस्थित राष्ट्रिय नाट्य विद्यालयले आयोजना गर्ने भारत रंग महोत्सवको २१ औं संस्करणमा माघ २६ गते नयाँ दिल्लीमा र माघ २८ गते देहरादूनमा मञ्चन गरिने कार्यक्रम रहेको छ । नाटकमा रमेश बुढाथोकी, शेखर चापागाईं, दयाहाङ राई, राजन खतिवडा, दिया मास्के, बुद्धि तामाङ, प्रदीपकुमार चौधरी, विजय बराल, मिलन कार्की, आर्जेश रेग्मी, सागर दाहाल, प्रमिला खनाल, सोमनाथ खनाल, सन्दिप श्रेष्ठ, रिजन परियार लगायत कलाकारहरूको अभिनय रहेको छ ।
यसैगरी बुधबार साँझको शोमा विभिन्न राजनीतिकर्मी, कलाकर्मी, पत्रकार विभिन्न संघसंस्थाका प्रतिनिधिले एकसाथ हेरेका छन् । यसको व्यवस्थापन युवा उद्यमी जयश बोहोरा र नेपाली कांग्रेस मोरङ ६ का क्षेत्रीय सभापति जितेन्द्र गोल्छाले गरेका थिए । यसको लागि एशियन थाई फुड्सको रमपम चाउचाउले प्रायोजन गरेको थियो ।
