काठमाडौंः सशस्त्र प्रहरी बलको कीर्तिपुरस्थित विद्यालयमा भएको करिब ११ करोड रुपैयाँ हिनामिना प्रकरणमा अख्तियार दुरुपयोग अनुसन्धान आयोगले उच्चपदस्थमाथि पनि अनुसन्धान थालेको छ । इन्स्पेक्टर कल्पना गुरुङ र उनका साथी लीलाबहादुर लामालाई पक्राउ गरेर अनुसन्धान थालिएकोमा डिआइजीसम्मका अधिकारीलाई आयोगले बयानमा बोलाएको छ ।

अनियमितताको समयमा विद्यालयको समादेशक रहेका हालका डिआइजी दिग्विजय सुवेदीलाई समेत आयोगले छानबिनको दायरामा ल्याएको छ । अख्तियारले छानबिन अघि बढाएपछि सशस्त्र प्रहरी प्रधान कार्यालयले सुवेदीलाई बाहिनीपतिको जिम्मेवारीबाट हटाएको छ । उनी कैलालीस्थित बाहिनीमा कार्यरत थिए । अख्तियारले यस प्रकरणमा एक दर्जनभन्दा धेरैको बयान लिइसकेको छ । विद्यालयको अनियमितता अनुसन्धानका लागि सुरुमा सशस्त्र प्रहरीको कल्याण शाखाले जिल्ला प्रहरी परिसर, काठमाडौंमा जाहेरी दिएको थियो । सोही जाहेरीका आधारमा गत २० असारमा प्रहरीले इन्स्पेक्टर गुरुङ र उनका साथी लामालाई पक्राउ गरेको थियो । पछि भ्रष्टाचार मुद्दा नै आकर्षित हुने निचोडका आधारमा प्रहरीले १० दिनपछि दुवैलाई अख्तियारमा बुझाएको थियो ।

दुई महिना अख्तियारकै हिरासतमा थुनामा राखेर अनुसन्धान गरेपछि उनीहरूलाई साढे १३ करोड धरौटीमा रिहा गरेको स्रोत बताउँछ । रिहा भएपछि लामा भने ठगीसम्बन्धी अर्को मुद्दामा प्रहरीकै हिरासतमा छन् । गुरुङ र लामामाथि पनि अख्तियारबाट अनुसन्धान जारी नै छ ।

इन्स्पेक्टर गुरुङले करिब ६ वर्ष कीर्तिपुरस्थित विद्यालयको लेखा अधिकृत भएर काम गरेकी थिइन् । विद्यालयको आम्दानीबापतको रकम कल्याण कोषमा जम्मा गर्नुपर्नेमा गैरकानुनी रूपमा निकालेर उनले साथी लामालाई दिँदै आएकी थिइन् । कतिपय रकम कनेक्ट आइपिएसबाट लामाको कम्पनीको खातामा स्थानान्तरण गरिएको छ । स्कुलको कमान्डेटको नम्बर भनेर लामाकै नम्बर बैंकलाई दिएर उनले झुक्याएकी थिइन् ।

dahal

सशस्त्र प्रहरीले आन्तरिक रूपमा छानबिन गरेको थियो । डिआइजी युवराज अर्यालको नेतृत्वमा छानबिन समिति बनेको थियो । छानबिनमा इन्स्पेक्टरकै योजनामा हिनामिना भएको निष्कर्ष निकालिएको थियो । सुरुमा उनीहरूलाई पैसा फिर्ता गर्ने मौका दिए पनि फिर्ता गर्न नसकेपछि कानुनी प्रक्रिया अघि बढेको हो । यसमा विद्यालयका तत्कालीन कमान्डेन्टहरू सुवेदीसहित भूपेन्द्र केसी तथा रामजंग पाण्डे पनि छानबिनमा छन् । यसमा कल्याण शाखाका अधिकारीको भूमिका पनि शंकास्पद देखिएको छ । यस प्रकरणमा अख्तियारको अनुसन्धान पनि अन्तिम चरणमा पुगेको स्रोत बताउँछ । 

पूर्वएआइजी दाहालले दिए पुनरावेदन निवेदन

लगििबिचौलिया इनम सापकोटासँग साँठगाँठको आरोपमा सेवाबाट हटाइएका सशस्त्र प्रहरीका तत्कालीन एआइजी वंशीराज दाहालले कारबाही पुनरावलोकनका लागि निवेदन दिएका छन् । उनले गृह मन्त्रालय हुँदै मन्त्रिपरिषद्मा पुनरावेदन निवेदन दिएका हुन् ।

गत २३ असोजमा उनलाई गृहमन्त्रीस्तरीय निर्णयबाट सेवाबाट हटाउने निर्णय भएको हो । सशस्त्र प्रहरी नियमावलीको दफा ११३ (ग)अनुसार आचरणसम्बन्धी कुरा बारम्बार उल्लंघन गरेको अभियोगमा सेवाबाट हटाइएको थियो । यस्तो विभागीय कारबाहीमा मन्त्रिपरिषद्मा पुनरावेदन गर्न सकिने प्रावधान नियमावलीमा छ ।

सोही प्रावधानअनुसार उनले निवेदन दिएको स्रोत बताउँछ । उनको पुनरावेदनउपर निर्णय भने भइसकेको छैन । हाल हिरासतमा रहेका सापकोटालाई सुरक्षासम्बन्धी संवेदनशील सूचना ह्वाट्सएपमा पठाएको खुलेपछि दाहाललाई सरकारले कारबाही गरेको हो । यो खबर आज प्रकाशित नयाँ पत्रिका दैनिकबाट लिइएको हो ।