धरान:बराह बचत तथा ऋण सहकारी संस्थाको १० अर्ब ७३ करोड रुपैयाँभन्दा बढीको रकम हिनामिना प्रकरणका मुख्य योजनाकार भनिएका शिवकुमार विश्वकर्मा (लामिछाने) पक्राउ परेका छन्।
गृहमन्त्री सुधन गुरुङले आफ्नो फेसबुकमार्फत विश्वकर्मालाई नेपाल प्रहरीको केन्द्रीय अनुसन्धान ब्युरो (सीआईबी) ले पक्राउ गरेको जानकारी सार्वजनिक गरेका हुन्। उनले बराह सहकारी प्रकरणमा लामो समयदेखि न्यायको प्रतीक्षामा रहेका पूर्वका बचतकर्तालाई न्याय दिलाउने प्रक्रिया अघि बढेको बताएका छन्।
गृहमन्त्री गुरुङले ६ वर्षअघि धरानमा ‘सेभ घोपा’ अभियान सञ्चालनका क्रममा बीपी कोइराला स्वास्थ्य विज्ञान प्रतिष्ठानको बेथिति विरुद्ध आवाज उठाउँदा पूर्वका बचतकर्ताले भोगिरहेको पीडा नजिकबाट सुनेको उल्लेख गरेका छन्। त्यतिबेलादेखि बचतकर्ताको पीडाले आफूलाई निरन्तर झकझकाइरहेको उनको भनाइ छ।

अभियन्ताका रूपमा रहँदा तथा जेनजी आन्दोलनपछि भएका विभिन्न प्रयासमा तत्कालै ठोस कदम चाल्न नसके पनि गृहमन्त्रीको जिम्मेवारी सम्हालेपछि पहिलो दिनदेखि नै पूर्वका नागरिकको पीडालाई न्याय दिन अनुसन्धान र खोजी कार्यलाई तीव्र बनाइएको उनले बताएका छन्।
उनका अनुसार १० अर्ब ७३ करोड रुपैयाँभन्दा बढीको बिगो हिनामिना प्रकरणका मुख्य योजनाकारलाई कानुनी कठघरामा उभ्याउने काम भएको छ। पक्राउसँगै सहकारीको रकम हिनामिना प्रकरणमा थप अनुसन्धान र कारबाही अघि बढ्ने अपेक्षा गरिएको छ।
गृहमन्त्री गुरुङले यस प्रकरणमा संलग्न अन्य दोषीहरूको खोजी तथा पक्राउ प्रक्रिया पनि क्रमशः तीव्र बनाइने बताएका छन्। सहकारीमा बचत गरेको रकम फिर्ताको प्रतीक्षामा रहेका सर्वसाधारणलाई न्याय दिलाउन सरकार प्रतिबद्ध रहेको उनको भनाइ छ।
बराह सहकारीको रकम हिनामिना प्रकरणले लामो समयदेखि धरानसहित पूर्वका हजारौँ बचतकर्तालाई प्रभावित बनाउँदै आएको छ। मुख्य योजनाकार पक्राउ परेको घोषणासँगै पीडित बचतकर्तामा न्याय प्राप्ति र बचत रकम फिर्ताको आशा बढेको छ।




















