प्रधानमन्त्री कार्यालयको पत्र र जाहेरीपछि सीआईबीको कारबाही, पूर्व श्रममन्त्री शेरबहादुर कुँवर र रामेश्वर राय यादव पनि प्रहरी नियन्त्रणमा
इटहरीः वैदेशिक रोजगारीमा जाने नेपाली श्रमिकबाट गैरकानुनी रूपमा असुल गरिएको १ अर्ब ६९ करोड २ लाख २४ हजार २६ रुपैयाँ बराबरको रकम विदेशी मुद्रा अपचलन गरी मलेसिया पठाउने निर्णयमा संलग्न रहेको आरोपमा दुई पूर्वमन्त्रीसहित ६ जना उच्चपदस्थ अधिकारी पक्राउ परेका छन्।
नेपाल प्रहरीको केन्द्रीय अनुसन्धान ब्युरो (सीआईबी) ले पूर्व श्रममन्त्रीद्वय शेरबहादुर कुँवर र रामेश्वर राय यादवसहित श्रम, रोजगार तथा सामाजिक सुरक्षा मन्त्रालयका तत्कालीन उच्च अधिकारीहरूलाई पक्राउ गरेको हो।
पक्राउ पर्नेमा तत्कालीन श्रम सचिव विनोद केसी, रोजगार व्यवस्थापन महाशाखाका तत्कालीन प्रमुखद्वय उमेश ढुंगाना र राजीव पोखरेल तथा मन्त्रालयकी तत्कालीन कानुन अधिकृत निर्मला गुरुङ रहेका छन्।
प्रहरीको अनुसन्धानअनुसार वैदेशिक रोजगारीमा जाने नेपाली श्रमिकबाट विभिन्न शीर्षकमा गैरकानुनी रूपमा रकम असुल गरी त्यसको ठूलो हिस्सा विदेशी मुद्रा अपचलनमार्फत मलेसिया पठाइएको प्रकरणमा उनीहरूको संलग्नता देखिएको आरोप छ।
अनुसन्धानमा श्रमिकबाट असुल गरिएको रकममध्ये ८३ लाख ७० हजार ४३९ अमेरिकी डलर र ३७ लाख १७ हजार ९८० पाउन्ड स्टर्लिङ विदेश पठाउने नीतिगत निर्णयमा उनीहरूको भूमिका रहेको उल्लेख छ।

नेपाल सरकार र मलेसिया सरकारबीच भएको समझदारीपत्र (एमओयू) तथा प्रचलित कानुनी व्यवस्थाविपरीत निर्णय गरिएको प्रहरीको आरोप छ।
श्रमिकमाथि संगठित रूपमा आर्थिक ठगी भइरहेको विषयमा आवश्यक कानुनी उपचार खोज्नुको सट्टा अधिकार क्षेत्र नाघेर विदेशी मुद्रा विदेश पठाउने निर्णय गरिएको आरोपमा उनीहरूमाथि अनुसन्धान अघि बढाइएको हो।
प्रधानमन्त्री कार्यालयको पत्रपछि अनुसन्धान अघि बढेको
यो प्रकरणले वैदेशिक रोजगारीका नाममा नेपाली श्रमिकमाथि हुने आर्थिक शोषण र त्यसमा नीतिगत तहबाट हुन सक्ने मिलेमतोको विषयलाई पुनः चर्चामा ल्याएको छ।
विशेषगरी वैदेशिक रोजगारीमा जाने सामान्य श्रमिकले दुःख गरेर कमाएको रकममाथि गैरकानुनी असुली भएको र त्यस्तो रकम विदेश पठाउने निर्णयमा उच्च तहका अधिकारीहरूको भूमिका रहेको आरोप गम्भीर रूपमा उठेको छ।
सीआईबीले ठगी तथा संगठित अपराध निवारण ऐन, २०७० लगायत प्रचलित कानुनअनुसार अनुसन्धान अघि बढाएको जनाइएको छ।
दुई पूर्वमन्त्रीसहित ६ जना उच्चपदस्थ व्यक्ति पक्राउ परेसँगै अब यस प्रकरणमा अन्य को–को संलग्न थिए, रकम असुली र विदेश पठाउने प्रक्रियामा कसले कस्तो भूमिका खेलेको थियो भन्ने विषय अनुसन्धानको मुख्य चासो बन्ने देखिएको छ।




















