इटहरीः विश्व मधुमेह दिवसको अवसरमा शनिवार श्रीकृष्ण प्रणामी प्रतिष्ठानद्वारा सञ्चालित एमआरएस अस्पताल र बीपी कोइराला स्वास्थ्य विज्ञान प्रतिष्ठान (बीपीकेआईएचएस), धरानको सहकार्यमा निःशुल्क स्वास्थ्य शिविर आयोजना गरिएको थियो।
शिविरमा बीपी कोइराला स्वास्थ्य विज्ञान प्रतिष्ठान, धरानका वरिष्ठ वैज्ञानिक डा. सञ्जीव कुमार शर्माले स्वास्थ्य सेवा प्रदान गरेका थिए । उक्त शिविरबाट करिब १४७ जनाले स्वास्थ्य परीक्षण तथा परामर्श सेवा लिएका थिए।
शिविरमा सहभागीहरूलाई निःशुल्क ओपीडी जाँच तथा चिकित्सकीय परामर्शका साथै विभिन्न प्रयोगशाला परीक्षणको सुविधा उपलब्ध गराइएको थियो। शिविरमा पिसाब परीक्षण, रगत परीक्षण, एचबीएवानसी (HbA1c), इकोकार्डियोग्राफी (ECHO) र ईसीजी (ECG) लगायतका परीक्षण निःशुल्क गरिएको थियो।
बिहान ७ बजेदेखि दिउँसो १ बजेसम्म सञ्चालन भएको शिविरमा विशेषगरी मधुमेहको पहिचान, परीक्षण तथा यसबाट हुन सक्ने स्वास्थ्य जोखिमबारे परामर्श प्रदान गरिएको थियो।
मधुमेहसम्बन्धी जनचेतना अभिवृद्धि गर्ने, समयमै रोगको पहिचान गर्ने र सर्वसाधारणलाई विशेषज्ञ स्वास्थ्य सेवाको पहुँचमा पुर्याउने उद्देश्यले शिविर आयोजना गरिएको आयोजकले जनाएको छ।
पछिल्लो समय मधुमेहको जोखिम बढ्दै गइरहेको अवस्थामा यस्ता निःशुल्क स्वास्थ्य शिविरले रोगको समयमै पहिचान र उपचारमा सहयोग पुर्याउनुका साथै सर्वसाधारणमा स्वास्थ्य सचेतना फैलाउन महत्त्वपूर्ण योगदान गर्ने अपेक्षा गरिएको छ।
