काठमाडौं: नक्कली शैक्षिक प्रमाणपत्र पेस गरेर सरकारी सेवामा प्रवेश गर्नुका साथै बढुवा र पदस्थापनसमेत भएको आरोपमा राष्ट्रिय अनुसन्धान विभागका प्रमुख अनुसन्धान अधिकृत रामबाबु प्रसाद चौधरीविरुद्ध भ्रष्टाचार मुद्दा दायर भएको छ।
अख्तियार दुरुपयोग अनुसन्धान आयोगले चौधरीविरुद्ध बुधबार विशेष अदालत काठमाडौंमा आरोपपत्र दायर गरेको हो।
आयोगका अनुसार राष्ट्रिय अनुसन्धान विभागमा कार्यरत प्रमुख अनुसन्धान अधिकृत चौधरीले सेवा प्रवेश र बढुवाका लागि पेस गरेका शैक्षिक प्रमाणपत्रहरू नक्कली रहेको उजुरी परेपछि अनुसन्धान गरिएको थियो।
अनुसन्धानका क्रममा उनले भारतको बिहार इन्टरमिडिएट एजुकेसन काउन्सिलबाट जारी भएको देखिने आईए तहको मार्कस स्टेटमेन्ट, प्रोभिजनल सर्टिफिकेट, कलेज लिभिङ सर्टिफिकेट, कन्डक्ट सर्टिफिकेट र माइग्रेशन सर्टिफिकेटलगायतका झुट्टा तथा नक्कली शैक्षिक प्रमाणपत्र पेस गरेको पुष्टि भएको अख्तियारले जनाएको छ।

ती प्रमाणपत्रका आधारमा चौधरी राष्ट्रिय अनुसन्धान विभागमा राष्ट्रसेवक कर्मचारीका रूपमा कार्यरत रहँदै बढुवा तथा पदस्थापन भई राजपत्रांकित द्वितीय श्रेणीको प्रमुख अनुसन्धान अधिकृत पदसम्म पुगेको आयोगको आरोप छ।
नक्कली प्रमाणपत्रकै आधारमा सरकारी ओहदा, लाभ तथा सुविधासमेत प्राप्त गरेको पुष्टि भएपछि चौधरीविरुद्ध भ्रष्टाचारसम्बन्धी कसुरमा मुद्दा दायर गरिएको अख्तियारले जनाएको छ।
आयोगले चौधरीलाई साविक भ्रष्टाचार निवारण ऐन, २०१७ को दफा १२ तथा प्रचलित भ्रष्टाचार निवारण ऐन, २०५९ को दफा १६ को उपदफा (१) बमोजिमको कसुरमा कारबाही गर्न मागदाबी गरेको छ।
यसैगरी, साविक ऐनको दफा १२ र दफा २९ को उपदफा (२) तथा प्रचलित भ्रष्टाचार निवारण ऐन, २०५९ को दफा १६ को उपदफा (१) बमोजिम कैद र जरिवानाको सजाय हुन माग गर्दै विशेष अदालतमा आरोपपत्र दायर गरिएको अख्तियारका प्रवक्ता सुरेश न्यौपानेले जानकारी दिएका छन्।




















