धरानः उपचारका क्रममा १४ वर्षीया दीपिका तामाङको मृत्यु भएपछि आक्रोशित आफन्तले बुधबार धरानस्थित बीपी कोइराला स्वास्थ्य विज्ञान प्रतिष्ठानमा तोडफोड गरेका छन्। आफन्तले उपचारमा संलग्न चिकित्सकको लापरबाहीका कारण दीपिकाको मृत्यु भएको आरोप लगाउँदै घटनाको निष्पक्ष छानबिन र दोषीमाथि कारबाहीको माग गरेका छन्।
धरान उपमहानगरपालिका–१५ की दीपिकालाई पेट दुख्ने समस्या भएपछि मंगलबार बिहान करिब साढे ७ बजे बीपी कोइराला स्वास्थ्य विज्ञान प्रतिष्ठानमा भर्ना गरिएको थियो। उपचारकै क्रममा मंगलबार राति करिब साढे ८ बजे उनको मृत्यु भएको परिवारले जनाएको छ।
दीपिकाको मृत्युको खबर सार्वजनिक भएपछि आक्रोशित आफन्तले प्रतिष्ठानको निर्देशक कार्यालय, बिल काउन्टर तथा आर्थिक प्रशासन शाखामा तोडफोड गरेका हुन्। तोडफोडका कारण केही समय प्रतिष्ठान परिसरमा तनावपूर्ण अवस्था सिर्जना भएको थियो।
मृतकका दाजु भूपेन्द्र तामाङले बच्चा वार्डमा कार्यरत चिकित्सकबाट चरम लापरबाही भएको आरोप लगाए। उनले उपचारमा भएको कमजोरीबारे निष्पक्ष छानबिन गरी दोषी देखिएमा सम्बन्धित चिकित्सकमाथि कारबाही गर्नुपर्ने माग गरे।
प्रतिष्ठान भन्छ– स्वास्थ्य प्रोटोकलअनुसार उपचार भएको हो
यता प्रतिष्ठान प्रशासनले भने चिकित्सकीय लापरबाहीका कारण दीपिकाको मृत्यु भएको भन्ने आरोप अस्वीकार गरेको छ।
प्रतिष्ठानका प्रवक्ता प्रा.डा. शमशेर श्रेष्ठले दीपिकाको उपचार स्वास्थ्य प्रोटोकलअनुसार नै गरिएको दाबी गरे। उनका अनुसार दीपिकामा उपचारका क्रममा मुटुसम्बन्धी समस्या देखिएको थियो।
प्रवक्ता श्रेष्ठले बिरामीमा देखिएको जटिल स्वास्थ्य अवस्थाका कारण मृत्यु भएको प्रारम्भिक जानकारी दिए। उपचारका क्रममा सिटी स्क्यान गर्नेसमेत समस्या उत्पन्न भएको उनले बताए।
तर, मृत्युको वास्तविक कारण तथा उपचारका क्रममा चिकित्सकीय लापरबाही भए–नभएको विषयमा भने छानबिनपछि मात्रै निष्कर्षमा पुग्न सकिने प्रतिष्ठान प्रशासनको भनाइ छ।
श्रेष्ठले घटनाको वास्तविक अवस्था पत्ता लगाउन छानबिन समिति गठन गरिने जानकारी दिए।
आफन्तका विभिन्न माग
तोडफोडपछि मृतकका आफन्त र प्रतिष्ठान प्रशासनबीच वार्ता भएको थियो। वार्तामा प्रतिष्ठानका निर्देशक इन्द्र लिम्बू, उपचारमा संलग्न चिकित्सक तथा नर्सलगायतको सहभागिता थियो।
वार्ताका क्रममा मृतकका आफन्तले उपचारमा संलग्न चिकित्सकको टोलीले सार्वजनिक रूपमा माफी माग्नुपर्ने माग राखेका छन्। उनीहरूले दीपिकाको उपचारमा भएको सम्पूर्ण खर्च प्रतिष्ठानले व्यहोर्नुपर्ने मागसमेत अघि सारेका छन्।
त्यस्तै, घटनाका क्रममा भएको तोडफोडलगायतका गतिविधिमा संलग्न मृतकका आफन्तमाथि कारबाही नगर्नुपर्ने तथा दीपिकाको परिवारका सदस्यलाई आजीवन निःशुल्क उपचारको व्यवस्था गर्नुपर्ने मागसमेत उनीहरूले राखेका छन्।
आफन्तले उठाएका मागबारे प्रतिष्ठान प्रशासनका प्रमुख तथा सम्बन्धित पक्षसँग थप छलफल गर्ने सहमति भएको छ। तत्काल सबै मागको टुंगो नलागे पनि पुनः वार्तामा बसेर विषयलाई निष्कर्षमा पुर्याउने सहमतिसहित प्रारम्भिक छलफल टुंगिएको जनाइएको छ।
छानबिनपछि मात्रै मृत्युको कारण स्पष्ट हुने
दीपिकाको मृत्युको कारण र उपचारका क्रममा चिकित्सकीय लापरबाही भए–नभएको विषय अहिले विवादको केन्द्रमा छ। परिवारले चिकित्सकको लापरबाहीलाई मृत्युको कारण मानेको छ भने प्रतिष्ठानले बिरामीको जटिल स्वास्थ्य अवस्थाका कारण मृत्यु भएको प्रारम्भिक दाबी गरेको छ।
यसबीच प्रतिष्ठानले गठन गर्ने छानबिन समितिले उपचारका क्रममा भएका सम्पूर्ण प्रक्रिया, चिकित्सक तथा स्वास्थ्यकर्मीको भूमिका र बिरामीको स्वास्थ्य अवस्थालगायतका विषय अध्ययन गर्ने जनाएको छ।
समितिको प्रतिवेदनपछि मात्रै दीपिकाको मृत्युको वास्तविक कारण तथा उपचारका क्रममा कुनै कमजोरी वा चिकित्सकीय लापरबाही भएको थियो वा थिएन भन्ने विषय स्पष्ट हुने प्रतिष्ठान प्रशासनको भनाइ छ।
घटनापछि प्रतिष्ठान परिसरमा सुरक्षा सतर्कता बढाइएको छ भने मृतकका आफन्त र प्रशासनबीच थप वार्ता गरी विवाद समाधानको प्रयास भइरहेको छ।
