इटहरीः भोटेकोशी नदीमा आएको विनाशकारी बाढीबाट प्रभावित तथा पीडितहरूको राहत, उद्धार तथा पुनःस्थापनाका लागि दुहबीस्थित फरवार्ड माइक्रोफाइनान्स लघुवित्त वित्तीय संस्था लिमिटेडले ३० लाख ६ सय ६५ रुपैयाँ सहयोग गरेको छ।
संस्थाले २०८३ भदौ १० गते भोटेकोशी नदीमा आएको विनाशकारी बाढीबाट रसुवा जिल्लाका विभिन्न स्थानमा ठूलो मानवीय तथा भौतिक क्षति भएको र आसपासका अन्य जिल्लासमेत प्रभावित भएको भन्दै विपद्मा परेकाहरूको उद्धार तथा राहतका लागि उक्त रकम उपलब्ध गराएको जनाएको छ।
फरवार्डले आफ्नो संस्थागत सामाजिक उत्तरदायित्व (सीएसआर) कोषबाट १६ लाख रुपैयाँ र संस्थाका कर्मचारीबाट संकलित १४ लाख ६ सय ६५ रुपैयाँ गरी कुल ३० लाख ६ सय ६५ रुपैयाँ प्रधानमन्त्री दैवी प्रकोप उद्धार कोषमा दाखिला गरेको हो।
संस्थाका अनुसार विपद्का कारण ठूलो जनधनको क्षति भएकाले प्रभावित नागरिकलाई तत्काल राहत उपलब्ध गराउन सहयोग पुग्ने उद्देश्यले रकम कोषमा जम्मा गरिएको हो। साथै, बाढीबाट प्रभावित नागरिकको दैनिक जीवनमा आवश्यक पर्ने सामग्रीसमेत वितरण गर्ने तयारी गरिएको संस्थाले जनाएको छ।
फरवार्डले बाढी तथा पहिरोका कारण ज्यान गुमाएका सबैप्रति श्रद्धाञ्जली व्यक्त गर्दै मृतकका परिवारजनमा समवेदना प्रकट गरेको छ। त्यस्तै, विपद्मा परी घाइते भएकाहरूको शीघ्र स्वास्थ्यलाभको कामना गर्दै उद्धार तथा राहत कार्यलाई थप प्रभावकारी बनाउन सम्बन्धित निकायलाई आग्रह गरेको छ।
संस्थाले प्राकृतिक विपद्का कारण प्रभावित नागरिकको जीवन सामान्य बनाउन सरकार, स्थानीय तह, सुरक्षा निकाय तथा सामाजिक संघसंस्थालगायत सबै पक्षको समन्वय र सहकार्य आवश्यक रहेको जनाएको छ। राहत तथा उद्धारसँगै प्रभावित क्षेत्रमा दैनिक उपभोग्य तथा अत्यावश्यक सामग्री पुर्याउनुपर्ने आवश्यकता रहेकाले त्यसतर्फ समेत ध्यान दिनुपर्ने संस्थाको भनाइ छ।
फरवार्ड माइक्रोफाइनान्स लघुवित्त वित्तीय संस्था लिमिटेड नेपाल राष्ट्र बैंकबाट इजाजत प्राप्त राष्ट्रियस्तरको कार्यक्षेत्र भएको ‘घ’ वर्गको वित्तीय संस्था हो। संस्थाले हाल नेपालको ४० जिल्लामा १५९ वटा शाखामार्फत वित्तीय सेवा प्रदान गर्दै आएको जनाएको छ।
संस्थाका अनुसार फरवार्डमा हाल २ लाख ८४ हजार ग्राहक सदस्य आबद्ध छन्। वित्तीय सेवा प्रवाहसँगै सामाजिक उत्तरदायित्वअन्तर्गत विभिन्न विपद् तथा सामाजिक कार्यमा समेत संस्थाले सहयोग गर्दै आएको जनाएको छ।
भोटेकोशी बाढीबाट प्रभावित क्षेत्रमा भएको मानवीय तथा भौतिक क्षतिपछि विभिन्न संघसंस्था, निजी क्षेत्र तथा व्यक्तिहरूले राहत र उद्धारका लागि सहयोग गर्दै आएका छन्। फरवार्डको उक्त सहयोग पनि विपद्मा परेका नागरिकलाई राहत उपलब्ध गराउने उद्देश्यले गरिएको संस्थाले जनाएको छ।
