इटहरीः इटहरी उपमहानगरपालिका–८ स्थित बिजुली अफिस नजिकबाट प्रहरीले खैरो हेरोइनजस्तो देखिने पदार्थ र प्रतिबन्धित औषधिसहित चार जनालाई पक्राउ गरेको छ।
लागूऔषध कारोबार भइरहेको भन्ने गोप्य सूचनाका आधारमा कोशी प्रदेश प्रहरी कार्यालय विराटनगरको पीआईटी, इलाका प्रहरी कार्यालय इटहरी र अस्थायी प्रहरी बिट पूर्वी गैसारबाट खटिएको संयुक्त प्रहरी टोलीले बुधबार दिउँसो उनीहरूलाई पक्राउ गरेको हो।
पक्राउ पर्नेमा मोरङको पथरी शनिश्चरे नगरपालिका–५ का २६ वर्षीय निकेश माझी, इटहरी उपमहानगरपालिका–८ का २२ वर्षीय युवराज विक, मोरङको केराबारी गाउँपालिका–१ का २१ वर्षीय रेजन विश्वकर्मा र झापाको अर्जुनधारा नगरपालिका–८ का २१ वर्षीय सन्देश राउत रहेका छन्।
जिल्ला प्रहरी कार्यालय सुनसरीका सूचना अधिकारी प्रहरी नायब उपरीक्षक चन्द्रबहादुर खड्काका अनुसार पक्राउ परेकाहरूको साथबाट ट्रामाडोल ९४१ क्याप्सुल, डाइसाइक्लोमिन १ हजार २३० ट्याब्लेट तथा ०।६० ग्राम खैरो हेरोइनजस्तो देखिने पदार्थ बरामद गरिएको छ।
त्यस्तै, घटनास्थलबाट विभिन्न कम्पनीका पाँच थान एन्ड्रोइड मोबाइल, को।३६ प ५५४७ नम्बरको बजाज कम्पनीको १५० सीसी मोटरसाइकल र नगद ५३ हजार २१० रुपैयाँ समेत बरामद गरिएको प्रहरीले जनाएको छ।
पक्राउ परेका चारै जनालाई थप अनुसन्धान तथा कानुनी कारबाहीका लागि इलाका प्रहरी कार्यालय इटहरीमा राखिएको जिल्ला प्रहरीले जनाएको छ।
