मोरङ । मोरङका प्रमुख जिल्ला अधिकारी इन्द्रदेव यादवले सार्वजनिक स्थलको रिपोर्टिङ गरिरहेका पत्रकारहरूलाई भिडियो नखिच्न भन्दै अवरोध गरेका छन् । आइतबार मोरङको सुन्दरहरैँचा ७ स्थित गछिया खोलाको किनारमा मापदण्ड विपरीत निर्माण गर्न लागिएको क्रसरको विषयमा विवाद भएपछि अनुगमनमा पुगेका प्रजिअ यादवले रिपोर्टिङका लागि पुगेका पत्रकारहरूलाई भिडियो नखिच्न भन्दै रोक लगाएका हुन् ।
स्थानीयवासी, क्रसरका सञ्चालक, जिल्ला समन्वय समिति प्रमुख अजम्मर राई र नगर प्रमुख केदार गुरागागई सहितको उपस्थितिमा भएको कुराकानीको छायाङ्कन गरिरहेका पत्रकारहरू नेपाल पत्रकार महासङ्घ मोरङका सहसचिव तथा मोरङ खबरका सञ्चालक रेवती रमण निरौला, विराट टेलिभिजन इटहरीका विकल पौडेल, न्युज २४ टेलिभिजनका मनोज भुजेल र पूर्वी अनलाइनका पत्रकार कृष्णचन्द्र सुवेदीलाई भिडियो नखिच्न भन्दै रोक लगाएका हुन् ।
रिपोर्टिङका लागि खबर पाएर पुगेका पत्रकारहरूले अनुगमनको भिडियो खिचिरहेका बेला यादवले कुराकानीको भिडियो नबनाउनु भन्दै रोकेका थिए । त्यस क्रममा मोरङ खबरका सञ्चालक रेवती रमण निरौलाले रेकर्ड गरिरहेको क्यामेरा यादवको हातले तल झार्न खोजेका थिए । कुराकानी गरिरहेको भिडियो रोक्न खोजेका प्रजिअ यादवले पछि अनुगमन पश्चात् पनि सञ्चारकर्मीलाई आफ्नो भनाई (बाईट) दिन समेत मानेनन् । नेपाल पत्रकार महासङ्घ मोरङका अध्यक्ष सुशीला पाठकले सार्वजनिक स्थलमा अनुगमन भइरहेको विषयमा सञ्चारकर्मीले भिडियो रेकर्ड गर्नु गलत नभएको बताईन । सार्वजनिक सरोकारको विषयमा भएका गतिविधि तथा अनुगमनको भिडियो रेकर्डमा रोक लगाउनु दुखद भएको उनले बताइन । यो कार्य सूचनाको हक सम्बन्धी ऐन र प्रेस स्वतन्त्रताको मर्म विपरीत रहेकाले राज्यका निकायमा बसेकाहरूले यस्ता कार्यहरू सच्याउनुपर्ने अध्यक्ष पाठकको भनाई छ ।
उघोगको विषयमा निर्णय लिइने
यता सुन्दरहरैँचा ७ स्थित गछिया खोलाको किनारमा सञ्चालन गर्न लागिएको गछिया इस्ट्रन एग्रिगेट एन्ड स्टोन मिल्सले मापदण्ड विपरीत काम गरेको अनुगमनका क्रममा देखिएको छ । आइतबार जिल्ला समन्वय समिति प्रमुख अजम्मर राई, मोरङका प्रमुख जिल्ला अधिकारी इन्द्रदेव यादव, नगर प्रमुख केदार गुरागाईँ, जिल्ला प्रहरी कार्यालय मोरङका एसपी नारायण चिमरियाको टोलीले क्रसर सञ्चालन हुन लागेको उघोगको अनुगमन गरेको थियो । अनुगमनको प्रारम्भिक निष्कर्ष उघोगले पुरानै लाइसेन्सबाट हाल उघोग सञ्चालन गर्न खोजेको देखिएको छ ।
मोरङका प्रजिअ यादवले उघोगका सञ्चालक प्रलाद लिम्बुलाई उघोगको लाइसेन्स तथा आवश्यक कागजात दुई दिन भित्र जिल्ला समन्वय समितिमा ल्याउन निर्देशन दिए । कागजात हेरेपछि मात्र जिल्ला समन्वय समितिको बैठकले आवश्यक निर्णय गर्ने जनाए । अनुगमनको क्रममा सुन्दरहरैचाका मेयर केदार प्रसाद गुरागाईँले उघोगले २०६० सालको वातावरणीय प्रभाव मूल्याङ्कन रिर्पोटको आधारमा उघोग जबरजस्ती चलाउन खोजेको बताउँदै हालको परिस्थितिमा उघोग चल्न अनुपयुक्त हुने बताए । अनुगमनको क्रममा भेला भएका स्थानीयवासीले समेत उघोगको कारण धुवा, धुलो, ध्वनिबाट प्रत्यक्ष अप्रत्यक्ष रूपमा मानव स्वास्थ्यमा प्रतिकुल असर पुग्ने भन्दै उघोग सञ्चालन नगर्न अनुगमन समितिलाई सुझाव दिएका थिए । मापदण्ड विपरीतको उघोग सञ्चालन गर्ने कार्य भए सडक आन्दोलन गर्ने समेत भेला भएका स्थानीयले चेतावनी दिए ।
तराई भूगोलको लागि क्रसर उघोग सञ्चालनको लागि दुरी सम्बन्धी मापदण्ड अनुसार खोला तथा नदी किनारबाट ५ सय मिटर, वन, घना बस्ती तथा सार्वजनिक भवन, विद्यालय, मन्दिरबाट २ किलोमिटर हुनु पर्ने नियम छ । यही आधारलाई लत्त्याउँदै बन्द रहेको गछिया इस्ट्रन एग्रिगेट एन्ड स्टोन मिल्सलाई नयाँ व्यवस्थापन दिएर पुर्न क्रसर सञ्चालनको तयारी गरिएको हो । हाल गणेशपुरका ३ वटा टोल विकास संस्थाका ३ सय बढी स्थानीयवासीको हस्ताक्षर सहित क्रसर उघोग सञ्चालन गर्न नदिन विभिन्न निकायमा निवेदन दिएको अवस्था छ ।
