इटहरी: नेकपा एमाले कोसी प्रदेश कमिटी सदस्य इटहरीका पूर्व मेयर द्धारिकलाल चौधरीलाई पार्टीले कारबाही गर्ने भएको छ ।
आज र भोली बस्ने एमालेको कोसी प्रदेश कमिटीको बैठकले चौधरीलाई कारबाहीको निर्णय गर्ने एमाले कोसी प्रदेश कमिटी स्रोतले जनाएको छ ।
पार्टीको कोसी प्रदेश कमिटीले २०८१ मङ्सिर २० गते चौधरीसँग पार्टीको हित र नीति विपरीत हिँडेको जनाउँदै ७ दिनभित्रमा लिखित स्पष्टीकरण सोधिएकोमा हालसम्म नदिई बसेकोमा उनलाई कारबाही गर्न लागिएको हो ।
उनलाई पार्टीको खानेपानी तथा सरसफाइ विभागका कोसी सचिव रामप्रसाद चौलागाईलाई कात्तिक २७ गते साँझ बिभिन्न समयमा सामाजिक सञ्जाल र भ्वाईस मार्फत अभद्र तथा अशिष्ट गालीगलौज गरेको रेकर्ड प्राप्त भएको जनाउँदै लिखित स्पष्टीकरण मागेको थियो ।
चौलागाईलाई पार्टीको विधान,अनुशासन र सामाजिक मूल्यमान्यता विपरीत गालीगलौज गरेकाले के कति कारणले त्यसो गरिएको हो ? ५ दिनभित्रमा लिखित स्पष्टीकरण पेस गर्न चौधरीलाई भनिएको थियो ।
चौधरीले लिखित स्पष्टीकरण नदिएपछि पार्टीको कोसी प्रदेश कमिटीको २०८१ चैत्र ९ गते बसेको सचिवालय बैठकले उनलाई जिम्मेवारीबाट मुक्त गराइको थियो । पार्टीका कोसी प्रदेश कमिटी अध्यक्ष घनश्याम खतिवडाले चौधरीलाई २०८२ वैशाख २ गते पत्र काट्दै २०८१ मङ्सिर २० गते सोधिएको स्पष्टीकरण ७ दिन भित्रमा पेस गर्न अनुरोध गरेका थिए ।
पछिल्लो पटक पार्टीले स्पष्टीकरण पेस गर्नका लागि पठाएको पत्रको समय ३ महिना बितिसक्दा पनि अटेर गरेकाले उनलाई पार्टीले अनुशासनको कारबाही गर्न लागेको बुझिएको छ । पत्रलाई गम्भीरतापूर्वक नलिए पार्टी विधान अनुसार अनुशासनको कारबाही सिफारिस हुने चौधरीलाई पछिल्लो पटक पठाइएको पत्रमा चेतावनी समेत दिइएको थियो ।
पार्टीले कारबाही गर्ने भएपछि निवर्तमान मेयर चौधरीले जथाभाबी अभिव्यक्ति दिन सुरु गरेका छन् । उनले केही दिनअघि स्थानीय एक टेलिभिजनमा अन्तर्वार्ता दिने क्रममा इटहरीमा बजेट होलिडे आउनुमा सबैभन्दा ठुलो हात उपमेयर सङ्गीताकुमारी चौधरीको रहेको आरोप लगाएका थिए । उनले इटहरीवासीको हितमा भन्दा पनि उपमेयर चौधरीले व्यक्तिगतपाइँदाको कुरा गरेको र पुरा नहुँदा बहना वाजी गरेर बजेट होलिडे गराएको दाबी नै गरेका थिए ।
द्धारिकलाल चौधरीले नै २०७९ को निर्वाचनमा उपमेयर पदमा सङ्गीताकुमारीलाई अघि सारेका मात्र थिएनन्,सबैभन्दा बढी मत दिलाएर जिताएका पनि थिए । सङ्गीताले सबैभन्दाबढी मत ल्याउँदा मेयरका उम्मेदवार यामकुमार सुब्बाले निकै कम मत पाई काँग्रेस सहितको गठबन्धन मेयरका उम्मेदवार हेम कर्ण पौडेलले विजय हात पारेका थिए ।
गत ३२ असारमा बजेट पास नभई होलिडेमा जान साथ इटहरी उपमहानगरपालिकाका मेयर पौडेलले एमालेका नेताहरूले भने जति बजेट नदिँदा इटहरी सरकार बजेट होलिडेको अवस्थामा पुगेको भन्दै आफ्नो आधिकारिक फेसबुकमा स्ट्याटस लेखेका थिए । उनले सो स्ट्याटस केही घण्टामै हटाएका थिए । मेयर पौडेलले स्ट्याटस मार्फत लगाएको आरोप र निवर्तमान मेयर चौधरीले लगाएको आरोप लगभग मिल्दोजुल्दो छ । जसले एमाले भित्र एउटा तरङ्ग ल्याउनुका साथै निर्वाचन ताका र पछि निवर्तमान मेयर चौधरीले खेलेको भूमिका माथि धेरै शङ्काहरू पैदा भएको एमालेका युवानेताहरुको तर्क छ ।
पार्टीको अनुशासन आयोगबाट कारबाहीमा पर्ने सुईको पाएपछि चौधरीले भोली(श्रावण २८) गते इटहरीको इन—टुरिस्ट प्यालेस होटेलमा पत्रकार सम्मेलनको आयोजना गरेका छन् । उनी निकट स्रोतका अनुसार चौधरीले पत्रकार सम्मेलन मार्फत नै पार्टी छाडेको घोषणा गर्ने छन् ।
गणतान्त्रिक व्यवस्थापछिका इटहरी उपमहानगरपालिकाका पहिलो मेयर भएका चौधरी नगरको विकासमा विवाद रहित नै भए । तर,उनको छुद्र व्यवहार र बोलीका कारण आधा कार्यकाल विवादित भए । उनी नियम विपरीत आफ्ना निकटहरूलाई जागिर लगाउने विषयमा पनि विवादित भएका थिए ।
विवादका बिच पाँच बर्से कार्यकाल सकिएपछि उनी एमाले पार्टी छाडेर माओवादी केन्द्रमा प्रवेश गरेका थिए । खुम टार स्थित प्रचण्ड निवास नै पुगेर उनले माओवादी केन्द्रको सदस्यता लिएका थिए । लगत्तै उनलाई प्रचण्डले २०७९ को प्रदेश निर्वाचनमा उम्मेदवारीका लागि टिकट समेत दिएका थिए । उनी एमालेमा रहँदा कहिले पनि राम्रो सम्बन्ध नभएका रेवती रमण भण्डारीसँग पराजित भएका थिए । भण्डारी अहिले कोसी प्रदेशको आन्तरिक तथा सङ्घीय मामिला मन्त्री छन् । प्रदेश निर्वाचनमा भण्डारीसँग नराम्रो गरी पराजित भएपछि उनी केही समय माओवादी रहेका थिए । त्यसपछि पुनः एमालेमा फर्किएका थिए । एमालेमा केन्द्रीय सदस्य पाउने आशामा रहेका उनलाई पार्टीले कोसी प्रदेश कमिटीको सदस्य बनाएको थियो ।
