धरानः सशस्त्र प्रहरी बलले सुनसरीको धरानबाट साढे २१ सय किलोभन्दा बढी अवैध गाँजासहित एक ट्रक नियन्त्रणमा लिएको छ।
धरान उपमहानगरपालिका–१३ स्थित कोशी लोकमार्ग खण्डबाट सोमबार सशस्त्र प्रहरी बल, नेपाल सुरक्षा बेस धरानले अवैध गाँजासहितको प्रदेश १–०२–००२ ख ०८४८ नम्बरको ट्रक नियन्त्रणमा लिइएको हो।
विशेष सूचनाका आधारमा भेडेटारबाट धरानतर्फ आउँदै गरेको उक्त ट्रक रोकेर जाँच गरिएको थियो। जाँचका क्रममा ट्रकमा रहेको ३१ बोरा अदुवा र तरकारीका बोरा मुनि लुकाएर राखिएको ७० बोरा गाँजा फेला परेको सशस्त्र प्रहरीले जनाएको छ।
बरामद गरिएको गाँजाको तौल करिब २ हजार १ सय किलोभन्दा बढी रहेको प्रारम्भिक अनुमान गरिएको छ। ट्रक नियन्त्रणमा लिने क्रममा चालकसहित संलग्न व्यक्तिहरू भने फरार भएका छन्। सशस्त्र प्रहरीले फरार व्यक्तिहरूको खोजी तीव्र पारेको जनाएको छ।
सशस्त्र प्रहरी बलका सह–प्रवक्ता प्रहरी नायब उपरीक्षक (डीएसपी) शैलेन्द्र थापाका अनुसार भेडेटार क्षेत्र हुँदै ठुलो परिमाणमा गाँजा तस्करी भइरहेको सूचनाका आधारमा निगरानी बढाइएको थियो। सोही क्रममा सो ट्रक धरानबाट नियन्त्रणमा लिइएको हो ।
