इटहरीःसुनसरीको धरानबाट हुण्डी कारोबारमा संलग्न रहेको आरोपमा प्रहरीले एक पुरुषलाई प्रहरीले पक्राउ गरेको छ।
गोप्य सूचनाका आधारमा नेपाल प्रहरी प्रधान कार्यालय, केन्द्रीय अनुसन्धान ब्यूरो (सीआईबी)ले शंकास्पद व्यक्तिहरूमाथि अनुसन्धान तथा वित्तीय कारोबारको विश्लेषण गर्ने क्रममा धरान उपमहानगरपालिका–१३ स्थायी ठेगाना भएका ज्योति शाही हुण्डी कारोबारमा संलग्न रहेको खुलेपछि पक्राउ गरिएको हो ।
उक्त कारोबारका सम्बन्धमा थप अनुसन्धानका लागि असोज ६ गते सुनसरी जिल्ला अदालतबाट पक्राउ अनुमति लिइएको थियो। त्यसपछि नेपाल प्रहरी प्रधान कार्यालय, केन्द्रीय अनुसन्धान ब्यूरो, कोशी प्रदेश प्रहरी कार्यालय विराटनगर र जिल्ला प्रहरी कार्यालय सुनसरीबाट खटिएको संयुक्त प्रहरी टोलीले बिहीबार धरान उपमहानगरपालिका–५, खैरेनीबाट शाहीलाई पक्राउ गरेको हो।
शाहीले अन्य व्यक्तिहरूसँगको मिलेमतोमा घरेलु तथा साना उद्योग कार्यालय, इटहरी, सुनसरीमा २०६८ भदौ १६ गते दर्ता भएको ‘शाही मनि ट्रान्सफर’ को नाममा विभिन्न बैंक तथा वित्तीय संस्थामा खाता खोलेर सञ्चालन गर्दै आएको अनुसन्धानबाट देखिएको प्रहरीले जनाएको छ ।
अनुसन्धानमा संलग्न प्रहरीका अनुसार शाहीले कृषि विकास बैंक, सेन्चुरी कमर्सियल बैंक, ग्लोबल आइएमई बैंकलगायत ५२ वटा बैंक तथा वित्तीय संस्थामा रहेका खाताहरू प्रयोग गरी करिब रु १ अर्ब ३ करोड ८४ लाख ७५ हजार ८४५ बराबरको कारोबार गरेको पाइएको छ ।
विदेशमा विभिन्न असम्बन्धित व्यक्तिहरूले आर्जन गरेको रकम अनौपचारिक माध्यमबाट नेपाल भित्र्याई स–साना रकममा विभाजन गरी कनेक्ट आइपीएस लगायतका विद्युतीय तथा डिजिटल माध्यममार्फत असम्बन्धित व्यक्तिहरूका बैंक खातामा रकम पठाउने गरी हुण्डी कारोबार गरेको देखिएको प्रहरीले जनाएको छ ।
पक्राउ परेका शाहीविरुद्ध हुण्डीसम्बन्धी कारोबार गर्न नहुने कसुरमा थप अनुसन्धान भइरहेको केन्द्रीय अनुसन्धान ब्यूरोका प्रवक्ता अनुप शमशेर जबराले जानकारी दिएका छन्। घटनामा संलग्न अन्य व्यक्ति तथा कारोबारको थप विवरणबारे अनुसन्धान भइरहेको प्रहरीले जनाएको छ।
